Şəms surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• And olsun günəşə və onun aydınlığına! (Şəms surəsi, 1)
  
  
• And olsun ondan sonra çıxan aya! (Şəms surəsi, 2)
  
  
• And olsun onu (günəşi) üzə çıxardan gündüzə! (Şəms surəsi, 3)
  
  
• And olsun onu (günəşi) örtən gecəyə! (Şəms surəsi, 4)
  
  
• And olsun göyə və onu xəlq edənə! (Şəms surəsi, 5)
  
  
• And olsun yer üzünə və onu döşəyənə! (Şəms surəsi, 6)
  
  
• And olsun nəfsə, onu yaradıb surət verənə, (Şəms surəsi, 7)
  
  
• Ona şər və xeyir duyğularını ilham edənə (and olsun)! (Şəms surəsi, 8)
  
  
• Nəfsini günahdan təmizləyən nicat tapmışdır. (Şəms surəsi, 9)
  
  
• Nəfsini günaha batıran isə ziyana düşmüşdür. (Şəms surəsi, 10)
  
  
• Səmud qövmü azğınlığı ucbatından haqqı təkzib etdi. (Şəms surəsi, 11)
  
  
• Onların ən bədbəxti (Allahın möcüzə olaraq göndərdiyi dəvəni kəsməyə) cumduğu zaman, (Şəms surəsi, 12)
  
  
• Allahın elçisi (Saleh) onlara: “Allahın dəvəsinə və onun su içməsinə mane olmayın!” - demişdi. (Şəms surəsi, 13)
  
  
• Ancaq onlar elçisi təkzib etdilər və dəvəni kəsdilər. Rəbbi də günahlarına görə onlara əzab göndərdi və oranı yerlə-yeksan etdi. (Şəms surəsi, 14)
  
  
• Allah bunun nəticəsindən (cəzalandırmaqdan) qorxmaz. (Şəms surəsi, 15)
  
  

Əsas Səhifə