Fəcr surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• And olsun dan yerinə! (Fəcr surəsi, 1)
  
  
• And olsun on gecəyə! (Fəcr surəsi, 2)
  
  
• And olsun cütə və təkə! (Fəcr surəsi, 3)
  
  
• And olsun ötüb keçən gecəyə! (Fəcr surəsi, 4)
  
  
• Məgər təmiz ağıl sahiblərinə görə bunlara and içilməzmi?! (Fəcr surəsi, 5)
  
  
• Rəbbinin Ad qövmünə nə etdiyini görmədinmi?! (Fəcr surəsi, 6)
  
  
• Bəs sütunları (yüksək binaları) olan İrəmə?! (Fəcr surəsi, 7)
  
  
• Məmləkətlər arasında onlar kimisi yaradılmamışdı. (Fəcr surəsi, 8)
  
  
• Vadidə qayaları oyan (və ev düzəldən) Səmud qövmünə də! (Fəcr surəsi, 9)
  
  
• Dirəklər sahibi Firona da! (Fəcr surəsi, 10)
  
  
• Onlar öz yurdlarında azğınlıq etmişdilər. (Fəcr surəsi, 11)
  
  
• Oralarda çoxlu fitnə-fəsad törətmişdilər. (Fəcr surəsi, 12)
  
  
• Buna görə də Rəbbin onlara əzab qamçısı endirdi. (Fəcr surəsi, 13)
  
  
• Şübhəsiz ki, sənin Rəbbin daim nəzarət edir. (Fəcr surəsi, 14)
  
  
• İnsana gəlincə, nə zaman Rəbbi onu sınamaq üçün ehtiram göstərib ona nemət bəxş etsə, o: “Rəbbim mənə ehtiram göstərdi!” - deyər. (Fəcr surəsi, 15)
  
  
• Ancaq Rəbbi onu sınamaq üçün ruzisini azaltsa, o dərhal: “Rəbbim məni alçaltdı (pərişan etdi)!” - deyər. (Fəcr surəsi, 16)
  
  
• Xeyr! Siz yetimə yaxşılıq etmirsiniz. (Fəcr surəsi, 17)
  
  
• Yoxsulu yedirtmək barəsində də bir-birinizi təşviq etmirsiniz. (Fəcr surəsi, 18)
  
  
• Mirası (halal-harama baxmadan) hərisliklə yeyirsiniz. (Fəcr surəsi, 19)
  
  
• Mal-mülkü çox sevirsiniz. (Fəcr surəsi, 20)
  
  
• Xeyr! Yer üzü sarsılıb parça-parça olduğu, (Fəcr surəsi, 21)
  
  
• Mələklər səf-səf düzüldükləri halda Rəbbin (Rəbbinin əmri) gəldiyi, (Fəcr surəsi, 22)
  
  
• Və cəhənnəm gətirildiyi zaman məhz o gün insan (bütün etdiklərini) xatırlayacaqdır. Ancaq xatırlamağın ona nə faydası var?! (Fəcr surəsi, 23)
  
  
• O: “Kaş (axirət) həyatım üçün çalışaydım”, - deyəcəkdir. (Fəcr surəsi, 24)
  
  
• Artıq o gün heç kim Allahın verdiyi əzabı verə bilməz. (Fəcr surəsi, 25)
  
  
• Heç kim Onun buxovladığı kimi buxovlaya bilməz. (Fəcr surəsi, 26)
  
  
• (O gün Allah möminlərə belə səslənəcəkdir:) “Ey rahatlıq tapan nəfs (insan)! (Fəcr surəsi, 27)
  
  
• Sən Rəbbindən, Rəbbin də səndən razı qalmış halda Ona dön! (Fəcr surəsi, 28)
  
  
• Beləcə, (yaxşı) bəndələrimin arasına daxil ol, (Fəcr surəsi, 29)
  
  
• Və cənnətimə gir!” (Fəcr surəsi, 30)
  
  

Əsas Səhifə