İnşiqaq surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Göy yarılacağı, (İnşiqaq surəsi, 1)
  
  
• Və Rəbbini dinləyib itaət edəcəyi zaman, (İnşiqaq surəsi, 2)
  
  
• Yer üzü dümdüz ediləcəyi, (İnşiqaq surəsi, 3)
  
  
• İçindəkiləri atıb boşalacağı, (İnşiqaq surəsi, 4)
  
  
• Və Rəbbini dinləyib itaət edəcəyi zaman! (İnşiqaq surəsi, 5)
  
  
• Ey insan! Həqiqətən, sən Rəbbinə qovuşana qədər çalışıb çabalayırsan. Nəhayət, Ona qovuşacaqsan. (İnşiqaq surəsi, 6)
  
  
• Kimin əməl dəftəri sağ tərəfindən verilərsə, (İnşiqaq surəsi, 7)
  
  
• Onun haqq-hesabı asan olacaq, (İnşiqaq surəsi, 8)
  
  
• Və sevinərək ailəsinin yanına qayıdacaqdır. (İnşiqaq surəsi, 9)
  
  
• Ancaq kimin əməl dəftəri arxa tərəfindən verilərsə, (İnşiqaq surəsi, 10)
  
  
• O, yox olmaq (ölmək) istəyəcək, (İnşiqaq surəsi, 11)
  
  
• Və alovlu oda girəcəkdir. (İnşiqaq surəsi, 12)
  
  
• O, (dünyada ikən) ailəsinin yanında sevincli idi. (İnşiqaq surəsi, 13)
  
  
• O heç vaxt (Rəbbinə) dönməyəcəyini zənn edirdi. (İnşiqaq surəsi, 14)
  
  
• Xeyr! Həqiqətən, Rəbbi onu görürdü. (İnşiqaq surəsi, 15)
  
  
• And içirəm şəfəqə, (İnşiqaq surəsi, 16)
  
  
• Gecəyə və qoynuna aldıqlarına, (İnşiqaq surəsi, 17)
  
  
• Bədirlənmiş aya! (İnşiqaq surəsi, 18)
  
  
• Həqiqətən, siz (ölüm) mərhələlərdən keçəcəksiniz. (İnşiqaq surəsi, 19)
  
  
• Onlara nə olub ki, iman etmirlər? (İnşiqaq surəsi, 20)
  
  
• Özlərinə Quran oxunduğu zaman səcdə etmirlər. (İnşiqaq surəsi, 21)
  
  
• Əksinə, inkar edənlər (Quranı və axirəti) təkzib edirlər. (İnşiqaq surəsi, 22)
  
  
• Halbuki Allah onların gizlətdiklərini yaxşı bilir. (İnşiqaq surəsi, 23)
  
  
• Ona görə də sən onlara ağrılı-acılı bir əzabla müjdə ver! (İnşiqaq surəsi, 24)
  
  
• Ancaq iman edib yaxşı işlər görənlər bundan istisnadır. Onlar üçün bitməz-tükənməz mükafat vardır. (İnşiqaq surəsi, 25)
  
  

Əsas Səhifə