Mürsəlat surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• And olsun bir-birinin ardınca göndərilənlərə (küləklərə)! (Mürsəlat surəsi, 1)
  
  
• And olsun şiddətli fırtınalara! (Mürsəlat surəsi, 2)
  
  
• And olsun (yağışı) yaydıqca yayanlara! (Mürsəlat surəsi, 3)
  
  
• And olsun (haqq ilə batili) bir-birindən ayıranlara! (Mürsəlat surəsi, 4)
  
  
• And olsun Zikri (Quranı) gətirənlərə - (Mürsəlat surəsi, 5)
  
  
• (Möminlərə) üzr dilətmək, yaxud (inkar edənlərə) xəbərdarlıq etmək üçün (gətirənlərə)! (Mürsəlat surəsi, 6)
  
  
• Sizə vəd olunan (qiyamət) mütləq baş verəcəkdir! (Mürsəlat surəsi, 7)
  
  
• Ulduzlar sönəcəyi zaman, (Mürsəlat surəsi, 8)
  
  
• Göy yarılacağı zaman, (Mürsəlat surəsi, 9)
  
  
• Dağlar toz olub göyə sovrulacağı zaman, (Mürsəlat surəsi, 10)
  
  
• Elçilərin (ümmətləri barədə şahidlik etmə) vaxtı təyin olunacağı zaman, (Mürsəlat surəsi, 11)
  
  
• (Belə deyiləcək:) “Onlara hansı günə qədər vaxt verilmişdir?” (Mürsəlat surəsi, 12)
  
  
• (Belə cavab veriləcək:) “Ayırd etmə gününə qədər!” (Mürsəlat surəsi, 13)
  
  
• (Ey elçi!) Ayırd etmə gününün nə olduğunu sən haradan biləsən?! (Mürsəlat surəsi, 14)
  
  
• O gün haqqı yalanlayanların vay halına! (Mürsəlat surəsi, 15)
  
  
• Biz əvvəlkiləri məhv etmədikmi?! (Mürsəlat surəsi, 16)
  
  
• Sonra gələnləri (Məkkə müşriklərini) də onlara qatacağıq. (Mürsəlat surəsi, 17)
  
  
• Biz günahkarlarla belə rəftar edirik. (Mürsəlat surəsi, 18)
  
  
• O gün haqqı yalanlayanların vay halına! (Mürsəlat surəsi, 19)
  
  
• (Ey insanlar!) Biz sizi zəif bir sudan yaratmadıqmı?! (Mürsəlat surəsi, 20)
  
  
• Onu möhkəm bir yerə (ana bətninə) yerləşdirdik, (Mürsəlat surəsi, 21)
  
  
• Müəyyən bir müddətə qədər. (Mürsəlat surəsi, 22)
  
  
• Biz buna qadir olduq. Biz nə qədər də qüdrətliyik! (Mürsəlat surəsi, 23)
  
  
• O gün haqqı yalanlayanların vay halına! (Mürsəlat surəsi, 24)
  
  
• Biz yer üzünü toplanma yeri etmədikmi - (Mürsəlat surəsi, 25)
  
  
• Dirilər və ölülər üçün?! (Mürsəlat surəsi, 26)
  
  
• Orada yüksək dağlar yaratdıq və sizə şirin su içirtdik. (Mürsəlat surəsi, 27)
  
  
• O gün haqqı yalanlayanların vay halına! (Mürsəlat surəsi, 28)
  
  
• (O gün inkar edənlərə belə deyiləcək:) “Yalan hesab etdiyinizə (cəhənnəmə) tərəf gedin! (Mürsəlat surəsi, 29)
  
  
• Üç qola ayrılmış kölgəyə tərəf gedin!” (Mürsəlat surəsi, 30)
  
  
• O nə kölgəlik olar, nə də alovdan qoruyar. (Mürsəlat surəsi, 31)
  
  
• O, saray qədər böyük qığılcımlar saçar. (Mürsəlat surəsi, 32)
  
  
• O (qığılcımlar), sarı dəvələr kimidir. (Mürsəlat surəsi, 33)
  
  
• O gün haqqı yalanlayanların vay halına! (Mürsəlat surəsi, 34)
  
  
• Bu, (inkar edənlərin) danışa bilməyəcəkləri gündür. (Mürsəlat surəsi, 35)
  
  
• Onların üzrxahlıq etmələrinə də icazə verilməz. (Mürsəlat surəsi, 36)
  
  
• O gün haqqı yalanlayanların vay halına! (Mürsəlat surəsi, 37)
  
  
• Bu, ayırd etmə günüdür. Sizi də, əvvəlkiləri də bir yerə topladıq. (Mürsəlat surəsi, 38)
  
  
• Əgər sizin bir hiyləniz varsa, Mənə hiylə qurun! (Mürsəlat surəsi, 39)
  
  
• O gün haqqı yalanlayanların vay halına! (Mürsəlat surəsi, 40)
  
  
• Şübhəsiz, müttəqilər kölgəliklərdə və çeşmə başlarında olacaqlar. (Mürsəlat surəsi, 41)
  
  
• İstədikləri meyvələrin arasında olacaqlar. (Mürsəlat surəsi, 42)
  
  
• (Onlara belə deyiləcək:) “Etdiyiniz yaxşı əməllərə görə nuşcanlıqla yeyin-için!” (Mürsəlat surəsi, 43)
  
  
• Həqiqətən, Biz yaxşı əməl sahiblərini belə mükafatlandırırıq. (Mürsəlat surəsi, 44)
  
  
• O gün haqqı yalanlayanların vay halına! (Mürsəlat surəsi, 45)
  
  
• (Ey inkar edənlər!) Hələlik yeyin və kef çəkin. Həqiqətən, siz günahkarlarsınız. (Mürsəlat surəsi, 46)
  
  
• O gün haqqı yalanlayanların vay halına! (Mürsəlat surəsi, 47)
  
  
• Onlara: “Rüku edin!” - deyildiyi zaman onlar rüku etməzlər. (Mürsəlat surəsi, 48)
  
  
• O gün haqqı yalanlayanların vay halına! (Mürsəlat surəsi, 49)
  
  
• Onlar bundan (Quran nazil olduqdan) sonra daha hansı sözə inanacaqlar?! (Mürsəlat surəsi, 50)
  
  

Əsas Səhifə