İnsan surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• İnsanın xatırlanmağa layiq olmadığı uzun bir müddət ötüb-keçmədimi?! (İnsan surəsi, 1)
  
  
• Şübhəsiz ki, Biz insanı sınamaq üçün qarışıq bir nütfədən yaratdıq, sonra da onu eşidən və görən bir varlıq halına gətirdik. (İnsan surəsi, 2)
  
  
• Biz ona doğru yolu göstərdik. Bundan sonra istər şükür etsin, istər nankor olsun. (İnsan surəsi, 3)
  
  
• Biz inkar edənlər üçün zəncirlər, qandallar və alovlu bir od hazırlamışıq. (İnsan surəsi, 4)
  
  
• Şübhəsiz ki, yaxşı əməl sahibləri kafur qatılmış (cənnət içkisi ilə dolu) badədən içəcəklər. (İnsan surəsi, 5)
  
  
• Allahın bəndələrinin içdiyi çeşmədən! Onu (istədikləri tərəfə) axıdacaqlar. (İnsan surəsi, 6)
  
  
• Onlar verdikləri sözü yerinə yetirər və vahiməsi hər yeri bürüyəcək o gündən qorxarlar. (İnsan surəsi, 7)
  
  
• Onlar öz nəfsi çəkməsinə baxmayaraq yeməyi yoxsula, yetimə və əsirə yedirərlər. (İnsan surəsi, 8)
  
  
• “Sizi yalnız Allah rizası üçün yedirdirik. Sizdən nə bir əvəz, nə də bir təşəkkür istəyirik. (İnsan surəsi, 9)
  
  
• Şübhəsiz ki, biz çətin və ağır bir günə görə Rəbbimizdən qorxuruq”. (İnsan surəsi, 10)
  
  
• Buna görə də Allah onları o günün şərindən qoruyacaq, onlara gözəllik və sevinc bəxş edəcəkdir. (İnsan surəsi, 11)
  
  
• Və səbr etdiklərinə görə onları cənnət və ipəklə mükafatlandırdı. (İnsan surəsi, 12)
  
  
• Orada taxtlara söykəniblər. Onlar orada nə qızmar günəşi, nə də şaxtalı soyuğu görərlər. (İnsan surəsi, 13)
  
  
• (Meyvələrin) kölgələri onlara çox yaxındır və onların dərilməsi çox asanlaşdırılıb. (İnsan surəsi, 14)
  
  
• Onların ətrafında gümüş büllur qablar və qədəhlər dolaşdırılır. (İnsan surəsi, 15)
  
  
• Gümüşdən olan bu büllur qədəhləri onların istədikləri ölçüdə hazırlamışlar. (İnsan surəsi, 16)
  
  
• Orada onlara qarışığı zəncəfil olan içki içirilir. (İnsan surəsi, 17)
  
  
• Bir bulaq ki, “səlsebil” adlanır. (İnsan surəsi, 18)
  
  
• Onların ətrafında həmişə gənc olan cavanlar dolanırlar. Onları gördüyün zaman səpələnmiş inci olduqlarını zənn edərsən. (İnsan surəsi, 19)
  
  
• Orada hara baxsan, çoxlu naz-nemət və böyük bir səltənət görərsən. (İnsan surəsi, 20)
  
  
• Onların əynində taftadan və atlazdan yaşıl paltarlar vardır. Onlar gümüş bilərziklərlər bəzəniblər. Rəbbi onlara tərtəmiz içki içirər. (İnsan surəsi, 21)
  
  
• (Onlara belə deyiləcək:) “Bu sizin mükafatınızdır. Sizin (dünyadakı) səylərinizin əvəzi verilmişdir”. (İnsan surəsi, 22)
  
  
• (Ey elçi!) Şübhəsiz ki, Biz sənə Quranı hissə-hissə nazil etdik. (İnsan surəsi, 23)
  
  
• Ona görə də sən Rəbbinin hökmünə (boyun əyib) səbir et və onlardan günahkar, yaxud nankor olana boyun əymə! (İnsan surəsi, 24)
  
  
• Səhər-axşam Rəbbinin adını zikr et! (İnsan surəsi, 25)
  
  
• Gecənin bir vaxtında Ona səcdə et və gecə uzun bir müddət Onu təsbeh et! (İnsan surəsi, 26)
  
  
• Həqiqətən, bunlar tez keçib gedəni (dünyanı) sevirlər, ağır bir günü (axirəti) isə ehmal edirlər. (İnsan surəsi, 27)
  
  
• Onları yaradan da, qüvvətli edən də Bizik. Əgər istəsək, onları bənzərləri ilə əvəz edərik. (İnsan surəsi, 28)
  
  
• Həqiqətən, bu (Quran), bir öyüddür. İstəyən, Rəbbinə tərəf bir yol tutar. (İnsan surəsi, 29)
  
  
• Allah diləməyincə, siz diləyə bilməzsiniz. Həqiqətən, Allah hər şeyi biləndir, hikmət sahibidir. (İnsan surəsi, 30)
  
  
• O, dilədiyini Öz mərhəmətinə nail edər. Zalımlar üçün isə şiddətli bir əzab hazırlamışdır. (İnsan surəsi, 31)
  
  

Əsas Səhifə