Müzzəmmil surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Ey örtünüb bürünən! (Müzzəmmil surəsi, 1)
  
  
• Az bir hissəsi istisna olmaqla, gecəni ibadətlə keçir! (Müzzəmmil surəsi, 2)
  
  
• Gecənin yarısını, yaxud yarısından daha az hissəsini (Müzzəmmil surəsi, 3)
  
  
• Və ya yarısından daha çox hissəsini ibadətlə keçir! Quranı asta-asta (təfəkkür edərək) oxu! (Müzzəmmil surəsi, 4)
  
  
• Şübhəsiz ki, Biz sənə ağır bir söz vəhy edəcəyik. (Müzzəmmil surəsi, 5)
  
  
• Gecə (ibadət üçün) qalxmaq daha təsirli və (Quran) oxumaq üçün daha münasibdir. (Müzzəmmil surəsi, 6)
  
  
• Çünki sənin gündüz məşğul olduğun uzun-uzadı işlərin var. (Müzzəmmil surəsi, 7)
  
  
• Rəbbinin adını zikr et və bütün varlığınla Ona yönəl! (Müzzəmmil surəsi, 8)
  
  
• O, şərqin də, qərbin də Rəbbidir. Ondan başqa heç bir ilah yoxdur. Ona görə də sən yalnız Ona təvəkkül et! (Müzzəmmil surəsi, 9)
  
  
• Onların dediklərinə səbir et və onlardan xoşluqla uzaqlaş! (Müzzəmmil surəsi, 10)
  
  
• Nemət içində üzüb haqqı yalanlayanları Mənə burax və onlara bir az möhlət ver! (Müzzəmmil surəsi, 11)
  
  
• Şübhəsiz ki, Bizim yanımızda (onlar üçün hazırlanmış) qandallar və cəhənnəm vardır. (Müzzəmmil surəsi, 12)
  
  
• Bir də boğazdan keçməyən yemək və ağrılı-acılı bir əzab vardır. (Müzzəmmil surəsi, 13)
  
  
• O gün yer üzü və dağlar silkələnəcək, dağlar dağılan qum yığınlarına çevriləcəkdir. (Müzzəmmil surəsi, 14)
  
  
• Biz Firona elçi göndərdiyimiz kimi sizə də haqqınızda şahidlik edəcək bir elçi göndərdik. (Müzzəmmil surəsi, 15)
  
  
• Ancaq Firon elçiyə qarşı çıxdı. Buna görə də onu şiddətli əzabla yaxaladıq. (Müzzəmmil surəsi, 16)
  
  
• Əgər haqqı inkar etsəniz, uşaqları ağ saçlı qocalara çevirəcək bir gündən özünüzü necə qoruyacaqsınız?! (Müzzəmmil surəsi, 17)
  
  
• (O gün) göy yarılacaq, Allahın vədi yerinə yetəcəkdir. (Müzzəmmil surəsi, 18)
  
  
• Şübhəsiz, bu (Quran), bir öyüddür. Artıq kim istəsə, Rəbbinə doğru özünə bir yol tutar. (Müzzəmmil surəsi, 19)
  
  
• (Ey elçi!) Şübhəsiz ki, Rəbbin sən və səninlə birlikdə olanlardan bir zümrənin gecənin üçdə ikisinə yaxın bir qismini, (bəzən) yarısını, (bəzən də) üçdə birini ibadətə ayırdığını bilir. Gecəni və gündüzü ölçüb-biçən Allahdır. O, bu vaxtları hesablaya bilməyəcəyinizi bildiyi üçün sizi bağışladı. Ona görə də Qurandan sizə asan gələn yeri oxuyun! O, içinizdən xəstə olanları, eləcə də Allahın lütfündən (ruzi) axtarmaq üçün yer üzündə səfər edənləri və Allah yolunda cəhd edənləri bilir. Elə isə ondan (Qurandan) sizə asan gələn yeri oxuyun! Namazı qılın, zəkatı verin və Allaha gözəl bir borc verin! Özünüz üçün (dünyada ikən) hansı xeyirli bir əməli etsəniz, Allah dərgahında onun daha xeyirli olduğunu və daha böyük mükafatı olduğunu görəcəksiniz. Allahdan bağışlanmağınızı diləyin! Həqiqətən, Allah bağışlayandır, rəhmlidir. (Müzzəmmil surəsi, 20)
  
  

Əsas Səhifə