Qələm surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Nun! Qələmə və (qələmlə) yazdıqlarına and olsun ki, (Qələm surəsi, 1)
  
  
• Sən Rəbbinin neməti sayəsində divanə deyilsən! (Qələm surəsi, 2)
  
  
• Şübhəsiz ki, sənin üçün bitməz-tükənməz bir mükafat vardır. (Qələm surəsi, 3)
  
  
• Həqiqətən, sən uca bir əxlaq sahibisən. (Qələm surəsi, 4)
  
  
• Sən də görəcəksən, onlar da görəcəklər - (Qələm surəsi, 5)
  
  
• Hansınızın divanə olduğunu. (Qələm surəsi, 6)
  
  
• Şübhəsiz ki, Rəbbin Öz yolundan azanları da, doğru yolda olanları da çox yaxşı bilir. (Qələm surəsi, 7)
  
  
• Ona görə də sən (haqqı) yalanlayanlara boyun əymə! (Qələm surəsi, 8)
  
  
• Onlar (müşriklər) istəyirlər ki, sən yumşaq davranasan, özləri də yumşaq davransınlar. (Qələm surəsi, 9)
  
  
• Bunlardan heç birinə boyun əymə: çox and içənə, alçaq kimsəyə, (Qələm surəsi, 10)
  
  
• Qeybət qırana, söz daşıyana, (Qələm surəsi, 11)
  
  
• Xeyrə mane olana, həddi aşana, günahkara, (Qələm surəsi, 12)
  
  
• Kobud olana, həmçinin zatı bəlli olmayana - (Qələm surəsi, 13)
  
  
• Onun mal-mülkü və övladları olsa belə! (Qələm surəsi, 14)
  
  
• Ayələrimiz ona oxunduğu zaman o: “Əvvəlkilərin əfsanələridir!” - deyər. (Qələm surəsi, 15)
  
  
• Biz yaxın bir vaxtda onun burnunu damğalayacağıq. (Qələm surəsi, 16)
  
  
• Biz bağ sahiblərini sınadığımız kimi, onları da sınadıq. O zaman onlar (bağ sahibləri) səhər açılanda (heç kim görmədən) məhsulu dərəcəklərinə and içmişdilər. (Qələm surəsi, 17)
  
  
• Heç bir şeyi istisna etməmişdilər (“İnşaAllah” deməmişdilər). (Qələm surəsi, 18)
  
  
• Ancaq onlar yuxuda ikən Rəbbin tərəfindən göndərilən əzab oranı bürüdü. (Qələm surəsi, 19)
  
  
• Beləcə, o bağ yanıb qapqara qaraldı. (Qələm surəsi, 20)
  
  
• Onlar səhər durub bir-birinə belə səsləndilər: (Qələm surəsi, 21)
  
  
• “Əgər məhsulu yığacaqsınızsa, bağınıza erkən gedin!” (Qələm surəsi, 22)
  
  
• Beləliklə, onlar yola düşdülər. Bir-birinə belə pıçıldayırdılar: (Qələm surəsi, 23)
  
  
• “Bu gün yanınıza heç bir yoxsul gəlməsin!” (Qələm surəsi, 24)
  
  
• Onlar (yoxsullara) mane ola biləcəklərini düşünərək erkən getdilər. (Qələm surəsi, 25)
  
  
• Ancaq oranı (bağı) gördükləri zaman belə dedilər: “Yəqin biz səhv gəlmişik. (Qələm surəsi, 26)
  
  
• Xeyr! Biz məhrum edilmişik”. (Qələm surəsi, 27)
  
  
• Onların ən yaxşısı belə dedi: “Sizə deməmişdimmi ki, (Rəbbinizi) həmd-səna ilə təsbeh etməlisiniz?!” (Qələm surəsi, 28)
  
  
• Onlar: “Rəbbimiz pak və müqəddəsdir! Həqiqətən, biz (özümüzə) zülm etmişik”, - dedilər. (Qələm surəsi, 29)
  
  
• Sonra da dönüb bir-birini qınamağa başladılar. (Qələm surəsi, 30)
  
  
• Onlar dedilər: “Vay bizim halımıza! Həqiqətən, biz həddi aşmışıq. (Qələm surəsi, 31)
  
  
• Ola bilsin ki, Rəbbimiz bunun əvəzinə bizə ondan daha yaxşısını verər. Biz Rəbbimizi (Onun rizasını) istəyirik”. (Qələm surəsi, 32)
  
  
• Əzab belədir! Şübhəsiz ki, axirət əzabı daha böyükdür. Kaş biləydilər. (Qələm surəsi, 33)
  
  
• Heç şübhəsiz, müttəqilər üçün Rəbbi yanında Nəim cənnətləri vardır. (Qələm surəsi, 34)
  
  
• Biz müsəlmanları günahkarlarla bir tutarıqmı?! (Qələm surəsi, 35)
  
  
• Sizə nə olub, necə hökm verirsiniz?! (Qələm surəsi, 36)
  
  
• Yoxsa sizin bir kitabınız var və siz (bu yanlış hökmləri) oradanmı oxuyursunuz?! (Qələm surəsi, 37)
  
  
• Orada bəyəndiyiniz hər şey mütləq sizin olacaqdır (yazılıb)?! (Qələm surəsi, 38)
  
  
• Yoxsa Biz sizə hökmünü verdiyiniz hər şeyin mütləq sizin olacağına dair qiyamət gününə qədər davam edən sözlər vermişik?! (Qələm surəsi, 39)
  
  
• Onlardan kimin buna zamin duracağını soruş. (Qələm surəsi, 40)
  
  
• Yoxsa onların şəriklərimi var?! Əgər doğru deyirlərsə, onda şəriklərini gətirsinlər. (Qələm surəsi, 41)
  
  
• O gün işlər çətinləşər və onlar səcdə etməyə dəvət olunarlar, lakin onların buna gücü çatmaz. (Qələm surəsi, 42)
  
  
• Gözləri yerə zillənmiş bir vəziyyətdə onları zillət bürüyər. Halbuki onlar sağlam ikən səcdə etməyə dəvət olunurdular. (Qələm surəsi, 43)
  
  
• (Ey elçi!) Sən bu sözü (Quranı) yalanlayanı Mənə həvalə et! Biz onları bilmədikləri bir yöndən yavaş-yavaş əzaba yaxınlaşdırırıq. (Qələm surəsi, 44)
  
  
• Mən onlara möhlət verirəm. Həqiqətən, Mənim fəndim (əzabım) çox güclüdür. (Qələm surəsi, 45)
  
  
• Yoxsa sən onlardan bir ücrət tələb edirsən və buna görə onlar ağır bir borc yükü altındadırlar?! (Qələm surəsi, 46)
  
  
• Yoxsa qeyb (lövhi-məhfuz) onların yanındadır və onlar (istədikləri kimi) yazırlar?! (Qələm surəsi, 47)
  
  
• Sən Rəbbinin hökmünə səbir et və balıq sahibi (Yunis) kimi olma! Bir zaman o, (balığın qarnında) dərdli-dərdli (Rəbbinə) səslənmişdi. (Qələm surəsi, 48)
  
  
• Əgər Rəbbindən ona bir nemət yetişməsəydi, o, qınanmış halda qupquru bir yerə atılacaqdı. (Qələm surəsi, 49)
  
  
• Lakin Rəbbi onu seçdi və salehlərdən etdi. (Qələm surəsi, 50)
  
  
• Həqiqətən, inkar edənlər Zikri (Quranı) eşitdikləri zaman az qala səni gözləri ilə yıxalar (gözə gətirələr). Onlar: “O divanədir!” - deyirlər. (Qələm surəsi, 51)
  
  
• Halbuki, o (Quran), aləmlər üçün yalnız bir öyüddür. (Qələm surəsi, 52)
  
  

Əsas Səhifə