Vaqiə surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Qiyamət qopduğu zaman! (Vaqiə surəsi, 1)
  
  
• Onun qopacağını heç kim inkar edə bilməz. (Vaqiə surəsi, 2)
  
  
• O, kimini alçaldar, kimini də ucaldar. (Vaqiə surəsi, 3)
  
  
• Yer şiddətlə sarsıldığı zaman, (Vaqiə surəsi, 4)
  
  
• Dağlar parçalanıb ovxalanaraq - (Vaqiə surəsi, 5)
  
  
• Səpələnmiş toz kimi olduğu zaman, (Vaqiə surəsi, 6)
  
  
• Siz üç firqəyə ayrılacaqsınız. (Vaqiə surəsi, 7)
  
  
• Sağ tərəfdəkilər! Nə xoşbəxtdir sağ tərəfdəkilər! (Vaqiə surəsi, 8)
  
  
• Sol tərəfdəkilər! Nə bədbəxtdir sol tərəfdəkilər! (Vaqiə surəsi, 9)
  
  
• (Yaxşı əməldə) öndə olanlar (mükafatda da) öndədirlər! (Vaqiə surəsi, 10)
  
  
• Onlar Allaha yaxın kimsələrdir. (Vaqiə surəsi, 11)
  
  
• Nəim cənnətlərində! (Vaqiə surəsi, 12)
  
  
• Onların çoxu əvvəlkilərdəndir. (Vaqiə surəsi, 13)
  
  
• Bir qismi də sonrakılardandır. (Vaqiə surəsi, 14)
  
  
• Onlar bəzədilmiş taxtlarda əyləşəcəklər. (Vaqiə surəsi, 15)
  
  
• Taxtların üstündə qarşı-qarşıya əyləşib söykənəcəklər. (Vaqiə surəsi, 16)
  
  
• Onların ətrafında həmişəcavan (xidmətçi) gənclər (mələk qılman) dolanacaqlar. (Vaqiə surəsi, 17)
  
  
• (Huşlandırmayan) Şərab bulağından doldurulmuş badələr, kuzələr və qədəhlərlə! (Vaqiə surəsi, 18)
  
  
• Ondan nə başları ağrıyar, nə də ağılları gedər. (Vaqiə surəsi, 19)
  
  
• (Onlar üçün) bəyəndikləri meyvələr, (Vaqiə surəsi, 20)
  
  
• Arzuladıqları quş əti, (Vaqiə surəsi, 21)
  
  
• Və gözəl gözlü (xidmətçi) hurilər (mələklər) vardır. (Vaqiə surəsi, 22)
  
  
• Onlar qorunub saxlanan inci kimidirlər. (Vaqiə surəsi, 23)
  
  
• Bu, onlara etdikləri əməllərin mükafatı olaraq veriləcəkdir. (Vaqiə surəsi, 24)
  
  
• Onlar orada nə boş bir söz, nə də günaha aparan bir şey eşidəcəklər - (Vaqiə surəsi, 25)
  
  
• “Salam! Salam!” sözlərindən başqa. (Vaqiə surəsi, 26)
  
  
• Sağ tərəfdəkilər! Nə xoşbəxtdir sağ tərəfdəkilər! (Vaqiə surəsi, 27)
  
  
• Onlar tikansız sidr ağacları arasında, (Vaqiə surəsi, 28)
  
  
• (Meyvələri) salxım-salxım sallanmış banan ağacları arasında, (Vaqiə surəsi, 29)
  
  
• Uzanmış kölgələr altında, (Vaqiə surəsi, 30)
  
  
• Daim axan suyun kənarında, (Vaqiə surəsi, 31)
  
  
• Çoxlu meyvələr arasında olacaqlar. (Vaqiə surəsi, 32)
  
  
• O məyvələr nə tükənər, nə də qadağan olunar. (Vaqiə surəsi, 33)
  
  
• Onlar hündür döşəklərdə oturacaqlar. (Vaqiə surəsi, 34)
  
  
• Həqiqətən, Biz qadınları yenidən başqa bir gözəllikdə yaradacağıq. (Vaqiə surəsi, 35)
  
  
• Biz onları bakirə xanımlar edəcəyik - (Vaqiə surəsi, 36)
  
  
• Ərini sevən həmyaşıd qadın. (Vaqiə surəsi, 37)
  
  
• Onlar sağ tərəfdəkilər üçündür. (Vaqiə surəsi, 38)
  
  
• Onların bir qismi əvvəlkilərdən, (Vaqiə surəsi, 39)
  
  
• Bir qismi də sonrakılardandır. (Vaqiə surəsi, 40)
  
  
• Sol tərəfdəkilər! Nə bədbəxtdir sol tərəfdəkilər! (Vaqiə surəsi, 41)
  
  
• Onlar qızmar yel və qaynar su içində, (Vaqiə surəsi, 42)
  
  
• Qapqara tüstü kölgəsi altında olacaqlar. (Vaqiə surəsi, 43)
  
  
• O nə sərin, nə də xoşagələndir. (Vaqiə surəsi, 44)
  
  
• Onlar bundan əvvəl bolluq içində idilər. (Vaqiə surəsi, 45)
  
  
• Onlar böyük günah işləməkdə israr edirdilər. (Vaqiə surəsi, 46)
  
  
• Onlar belə deyirdilər: “Biz ölüb torpaq və sür-sümük olduqdan sonra təkrar dirildiləcəyik? (Vaqiə surəsi, 47)
  
  
• Əvvəlki atalarımız da?” (Vaqiə surəsi, 48)
  
  
• De: “Heç şübhəsiz, əvvəlkilər də, sonrakılar da, (Vaqiə surəsi, 49)
  
  
• Məlum bir günün (axirət gününün) müəyyən vaxtında toplanacaqlar. (Vaqiə surəsi, 50)
  
  
• Sonra siz, ey haqq yoldan azanlar, haqqı yalanlayanlar! (Vaqiə surəsi, 51)
  
  
• Şübhəsiz ki, zəqqum ağacından yeyəcəksiniz. (Vaqiə surəsi, 52)
  
  
• Qarınlarınızı onunla dolduracaqsınız. (Vaqiə surəsi, 53)
  
  
• Onun üstündən də qaynar su içəcəksiniz. (Vaqiə surəsi, 54)
  
  
• Həm də susamış dəvələrin içdiyi kimi içəcəksiniz. (Vaqiə surəsi, 55)
  
  
• Bu onların haqq-hesab günündəki ziyafətidir. (Vaqiə surəsi, 56)
  
  
• Sizi Biz yaratdıq. (Elə isə) təsdiqləməli deyilsinizmi? (Vaqiə surəsi, 57)
  
  
• Elə isə deyin görək, (ana rəhminə) atdığınız nədir? (Vaqiə surəsi, 58)
  
  
• Onu siz yaradırsınız, yoxsa Biz?! (Vaqiə surəsi, 59)
  
  
• Sizin aranızda ölümü də Biz müəyyənləşdirdik. Heç kim Bizə mane ola bilməz - (Vaqiə surəsi, 60)
  
  
• Sizin yerinizə bənzərlərinizi gətirməkdə və sizi bilmədiyiniz bir şəkildə yenidən yaratmaqda! (Vaqiə surəsi, 61)
  
  
• Şübhəsiz ki, siz ilk yaradılışı bilirsiniz. Elə isə düşünüb ibrət almalı deyilsinizmi? (Vaqiə surəsi, 62)
  
  
• Bəs əkdikləriniz barədə nə deyirsiniz? (Vaqiə surəsi, 63)
  
  
• Onu siz bitirirsiniz, yoxsa Biz? (Vaqiə surəsi, 64)
  
  
• Əgər Biz istəsəydik, əlbəttə, onu bir saman çöpünə çevirərdik. Siz də təəccüb içində qalıb: (Vaqiə surəsi, 65)
  
  
• “Həqiqətən, biz ziyana uğramışıq. (Vaqiə surəsi, 66)
  
  
• Daha doğrusu biz (ruzimizdən) məhrum qalmışıq”, - (deyərdiniz). (Vaqiə surəsi, 67)
  
  
• Bəs içdiyiniz su barədə nə deyirsiniz? (Vaqiə surəsi, 68)
  
  
• Onu buluddan siz endirirsiniz, yoxsa Biz? (Vaqiə surəsi, 69)
  
  
• Əgər Biz istəsəydik, onu duzlu edərdik. Bunun üçün şükür etməli deyilsinizmi?! (Vaqiə surəsi, 70)
  
  
• Bəs yandırdığınız od barədə nə deyirsiniz? (Vaqiə surəsi, 71)
  
  
• Onun ağacını siz yaradırsınız, yoxsa Biz? (Vaqiə surəsi, 72)
  
  
• Biz onu ibrət olsun və yolçular istifadə etsin deyə yaratdıq. (Vaqiə surəsi, 73)
  
  
• Ona görə də uca Rəbbinin adını təsbeh et! (Vaqiə surəsi, 74)
  
  
• Xeyr, ulduzların mövqelərinə and olsun. (Vaqiə surəsi, 75)
  
  
• Kaş bunun böyük bir and olduğunu biləydiniz. (Vaqiə surəsi, 76)
  
  
• O, həqiqətən, dəyərli Qurandır. (Vaqiə surəsi, 77)
  
  
• Qorunmuş bir Kitabdadır (Lövhi-məhfuzdadır). (Vaqiə surəsi, 78)
  
  
• Ona (xurafatlardan) təmizlənmişlərdən başqa heç kəs toxuna bilməz. (Vaqiə surəsi, 79)
  
  
• O (Quran), aləmlərin Rəbbi tərəfindən nazil edilmişdir. (Vaqiə surəsi, 80)
  
  
• İndi siz bu sözümü yalanlayırsınız?! (Vaqiə surəsi, 81)
  
  
• Sizə verilən ruzini təkzib edərəkmi şükür edirsiniz?! (Vaqiə surəsi, 82)
  
  
• Can boğaza çatdığı zaman - (Vaqiə surəsi, 83)
  
  
• O an siz (can verən adama) baxıb qalırsınız. (Vaqiə surəsi, 84)
  
  
• Biz ona sizdən daha yaxınıq, lakin siz görmürsünüz. (Vaqiə surəsi, 85)
  
  
• Əgər (öldükdən sonra) haqq-hesaba çəkiləsi deyilsinizsə, (Vaqiə surəsi, 86)
  
  
• Və doğru deyirsinizsə, onu (o canı) geri gətirin! (Vaqiə surəsi, 87)
  
  
• Ancaq (ölən insan) Allaha yaxın olanlardandırsa, (Vaqiə surəsi, 88)
  
  
• Onun üçün rahatlıq, gözəl ruzi və Nəim cənnəti vardır. (Vaqiə surəsi, 89)
  
  
• Əgər sağ tərəfdəkilərdəndirsə, (Vaqiə surəsi, 90)
  
  
• (Ona belə deyilər:) “Sağ tərəfdəkilərdən sənə salam olsun!” (Vaqiə surəsi, 91)
  
  
• Əgər haqqı yalanlayıb doğru yoldan azanlardandırsa, (Vaqiə surəsi, 92)
  
  
• Onun üçün qaynar su ziyafəti olacaqdır. (Vaqiə surəsi, 93)
  
  
• O, cəhənnəmə atılacaqdır. (Vaqiə surəsi, 94)
  
  
• Şübhəsiz ki, bu, danılmaz həqiqətdir. (Vaqiə surəsi, 95)
  
  
• Elə isə uca Rəbbinin adını təsbeh et! (Vaqiə surəsi, 96)
  
  

Əsas Səhifə