Qamər surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Qiyamət yaxınlaşdı və ay yarıldı. (Qamər surəsi, 1)
  
  
• Əgər onlar bir möcüzə görsələr, ondan üz çevirib: “Bu, davam edən bir sehrdir!” - deyərlər. (Qamər surəsi, 2)
  
  
• Onlar (Quranı) yalanladılar və öz nəfsinin arzularına uydular. Halbuki hər bir işin (Allah tərəfindən) qərarlaşdırılmış bir vaxtı vardır. (Qamər surəsi, 3)
  
  
• Həqiqətən, onlara (günahlardan) çəkindirən neçə-neçə xəbərlər gəlmişdir. (Qamər surəsi, 4)
  
  
• Bu, böyük bir hikmətdir. Ancaq (haqdan üz çevirənə) xəbərdarlıqlar heç bir fayda verməz. (Qamər surəsi, 5)
  
  
• Elə isə carçının bilinməyən bir şeyə çağıracağı günə qədər sən də onlardan üz çevir! (Qamər surəsi, 6)
  
  
• Onlar ətrafa səpələnmiş çəyirtkələr kimi, zəlil halda baxaraq (ortaya) çıxacaqlar. (Qamər surəsi, 7)
  
  
• İnkar edənlər carçıya tərəf qaçarkən: “Bu çox çətin bir gündür!” - deyəcəklər. (Qamər surəsi, 8)
  
  
• Onlardan əvvəl Nuh qövmü də (haqqı) təkzib etmiş və bəndəmizi yalanlayaraq: “O divanədir!” - deyib onu təhdid etmişdilər. (Qamər surəsi, 9)
  
  
• Bu zaman Nuh: “Mən məğlub oldum, yardım et!” - deyə Rəbbinə yalvarmışdı. (Qamər surəsi, 10)
  
  
• Biz də göyün qapılarını leysan yağışı ilə açdıq. (Qamər surəsi, 11)
  
  
• Yerdən də bulaqlar fışqırtdıq. Beləliklə, sular təqdir edilmiş bir iş üçün birləşdi. (Qamər surəsi, 12)
  
  
• Nuhu da taxtadan düzəldilib mismarlanmış bir gəmidə daşıdıq. (Qamər surəsi, 13)
  
  
• O gəmi, (qövmü tərəfindən) inkar edilənə (Nuha) mükafat olaraq gözlərimizin önündə (nəzarətimiz altında) üzürdü. (Qamər surəsi, 14)
  
  
• Həqiqətən, Biz onu ibrət olsun deyə saxladıq. Bəs ibrət alan varmı? (Qamər surəsi, 15)
  
  
• Mənim əzabım və xəbərdarlığım necə oldu?! (Qamər surəsi, 16)
  
  
• Həqiqətən, Biz Quranı ibrət almaları üçün asanlaşdırdıq. Bəs ibrət alan varmı? (Qamər surəsi, 17)
  
  
• Ad qövmü də (Hudu) yalanlamışdı. Bəs Mənim əzabım və xəbərdarlığım necə oldu?! (Qamər surəsi, 18)
  
  
• Həqiqətən, Biz onların üstünə uğursuzluğu davam edən bir gündə uğultulu soyuq bir külək göndərdik. (Qamər surəsi, 19)
  
  
• O külək, insanları kökündən qopmuş xurma kötükləri kimi (yerdən) qopardırdı. (Qamər surəsi, 20)
  
  
• Bəs Mənim əzabım və xəbərdarlığım necə oldu?! (Qamər surəsi, 21)
  
  
• Şübhəsiz ki, Biz Quranı ibrət almaları üçün asanlaşdırdıq. Bəs ibrət alan varmı? (Qamər surəsi, 22)
  
  
• Səmud qövmü də xəbərdarlıqları yalan saymışdı. (Qamər surəsi, 23)
  
  
• Onlar demişdilər: “Özümüzdən olan bir insanamı tabe olacağıq? O zaman biz azğınlığa düşmüş və çılğınlıq etmiş olarıq. (Qamər surəsi, 24)
  
  
• Aramızdan onamı vəhy gəldi? Xeyr! O, lovğa bir yalançıdır”. (Qamər surəsi, 25)
  
  
• Onlar lovğa yalançının kim olduğunu sabah biləcəklər. (Qamər surəsi, 26)
  
  
• Onları sınamaq üçün dişi bir dəvə göndərən Bizik. (Ey Saleh!) Ona görə də sən onları gözlə və səbir et! (Qamər surəsi, 27)
  
  
• Onlara bildir ki, su onların arasında bölüşdürülmüşdür. Hər kəs su içməyə öz növbəsində gəlsin!” (Qamər surəsi, 28)
  
  
• Nəhayət, onlar öz yoldaşlarını çağırdılar. O da (qılıncını) alıb (dəvəni) kəsdi. (Qamər surəsi, 29)
  
  
• Bəs Mənim əzabım və xəbərdarlığım necə oldu?! (Qamər surəsi, 30)
  
  
• Biz onlara qorxunc bir səs göndərdik və onlar heyvan ağılına qoyulan quru ot kimi oldular. (Qamər surəsi, 31)
  
  
• Şübhəsiz ki, Biz Quranı ibrət almaları üçün asanlaşdırdıq. Bəs ibrət alan varmı? (Qamər surəsi, 32)
  
  
• Lut qövmü də xəbərdarlıqları yalan saymışdı. (Qamər surəsi, 33)
  
  
• Biz onların üstünə daş yağdıran bir fırtına göndərdik. Yalnız Lut ailəsini sübh çağı xilas etdik. (Qamər surəsi, 34)
  
  
• Tərəfimizdən bir nemət olaraq! Biz şükür edəni belə mükafatlandırırıq. (Qamər surəsi, 35)
  
  
• Həqiqətən, Lut onlara şiddətli əzabımız barəsində xəbərdarlıq etmişdi. Ancaq onlar xəbərdarlıqlara şübhə etmişdilər. (Qamər surəsi, 36)
  
  
• Onlar Lutun qonaqlarına (yaraşıqlı oğlanlar kimi görünən mələklərə) pislik etmək istəmişdilər. Biz də onların gözlərini kor etdik. İndi əzabımı və təhdidlərimi dadın! (Qamər surəsi, 37)
  
  
• Həqiqətən, səhər tezdən daimi bir əzab onları yaxaladı. (Qamər surəsi, 38)
  
  
• İndi əzabımı və təhdidlərimi dadın! (Qamər surəsi, 39)
  
  
• Şübhəsiz ki, Biz Quranı ibrət almaları üçün asanlaşdırdıq. Bəs ibrət alan varmı? (Qamər surəsi, 40)
  
  
• Fironun qövmünə də xəbərdarlıqlar gəlmişdi. (Qamər surəsi, 41)
  
  
• Onlar bütün ayələrimizi yalanladılar. Buna görə də onları güc və qüdrətimizə layiq bir şəkildə (əzabla) yaxaladıq. (Qamər surəsi, 42)
  
  
• Sizin inkar edənləriniz onlardan daha yaxşıdır?! Yoxsa kitablarda sizin toxunulmaz olduğunuzmu yazılıb?! (Qamər surəsi, 43)
  
  
• Yoxsa onlar: “Biz müzəffər bir dəstəyik”, - deyirlər? (Qamər surəsi, 44)
  
  
• Yaxın bir vaxtda o dəstə məğlub olacaq və onlar arxalarına dönüb qaçacaqlar. (Qamər surəsi, 45)
  
  
• Xeyr! Onlara vəd olunan qiyamətdir (axirət əzabıdır). Qiyamət isə daha çətin və daha acıdır. (Qamər surəsi, 46)
  
  
• Həqiqətən, günahkarlar azğınlıq və çılğınlıq içindədirlər. (Qamər surəsi, 47)
  
  
• Üzüstə cəhənnəmə sürüklənəcəkləri gün (onlara belə deyiləcəkdir:) “Dadın sizə toxunan cəhənnəm əzabını!” (Qamər surəsi, 48)
  
  
• Şübhəsiz ki, Biz hər şeyi tale ilə yaratdıq. (Qamər surəsi, 49)
  
  
• Bizim əmrimiz bir göz qırpımında gerçəkləşər. (Qamər surəsi, 50)
  
  
• Şübhəsiz ki, Biz sizin kimiləri məhv etmişdik. Bəs ibrət alan varmı? (Qamər surəsi, 51)
  
  
• Onların etdiyi hər şey kitablarda (əməl dəftərlərində) mövcuddur. (Qamər surəsi, 52)
  
  
• Böyük-kiçik hər bir şey yazılmışdır. (Qamər surəsi, 53)
  
  
• Şübhəsiz ki, müttəqilər cənnət bağlarında və çaylar kənarında olacaqlar. (Qamər surəsi, 54)
  
  
• Güclü hökmdar olan Allahın dərgahında haqq məclisində olacaqlar. (Qamər surəsi, 55)
  
  

Əsas Səhifə