Zəriyət surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Toz-torpaq qaldıran küləklərə, (Zəriyət surəsi, 1)
  
  
• yağış yüklü buludlara, (Zəriyət surəsi, 2)
  
  
• rahatlıqla üzüb gedən gəmilərə və (Zəriyət surəsi, 3)
  
  
• işləri bölüşdürən mələklərə and olsun ki, (Zəriyət surəsi, 4)
  
  
• Sizə vəd olunan (axirət həyatı) haqdır. (Zəriyət surəsi, 5)
  
  
• Şübhəsiz, haqq-hesab mütləq baş verəcəkdir. (Zəriyət surəsi, 6)
  
  
• İçində yollar (orbitlər) olan göyə and olsun ki, (Zəriyət surəsi, 7)
  
  
• Siz (Quran barəsində) müxtəlif sözlər deyirsiniz. (Zəriyət surəsi, 8)
  
  
• (Qurandan) dönən kimsə ondan döndərilər. (Zəriyət surəsi, 9)
  
  
• Qəhr olsun yalançılar! (Zəriyət surəsi, 10)
  
  
• O kəslər ki, cəhalət içində qalmış qafillərdir. (Zəriyət surəsi, 11)
  
  
• Onlar haqq-hesab gününün nə vaxt olacağını soruşurlar. (Zəriyət surəsi, 12)
  
  
• O gün onlara cəhənnəmdə əzab veriləcəkdir. (Zəriyət surəsi, 13)
  
  
• (Onlara belə deyiləcək:) “Dadın əzabınızı! Bu, tezliklə gəlməsini istədiyiniz şeydir”. (Zəriyət surəsi, 14)
  
  
• Şübhəsiz, müttəqilər cənnətlərdə və çeşmə başlarında olacaqlar. (Zəriyət surəsi, 15)
  
  
• Rəbbinin onlara verdiyini (mükafatlarını) alacaqlar. Çünki onlar bundan əvvəl yaxşı əməl sahibləri idilər. (Zəriyət surəsi, 16)
  
  
• Onlar gecələr (ibadət edib) çox az yatırdılar. (Zəriyət surəsi, 17)
  
  
• Sübh çağında isə istiğfar edirdilər. (Zəriyət surəsi, 18)
  
  
• Mallarında da istəyənin və yoxsulun haqqı (payı) var idi. (Zəriyət surəsi, 19)
  
  
• Yer üzündə yəqinliklə inananlar üçün (Allahın varlığını və qüdrətini göstərən) dəlillər vardır. (Zəriyət surəsi, 20)
  
  
• Sizin özünüzdə də (buna dair dəlillər vardır)! Hələ də görmürsünüzmü? (Zəriyət surəsi, 21)
  
  
• Göydə də ruziniz (yağış) və sizə vəd olunan (mükafat və ya cəzalar) vardır. (Zəriyət surəsi, 22)
  
  
• Göyün və yerin Rəbbinə and olsun ki, bu vəd sizin danışığınız kimi gerçəkdir. (Zəriyət surəsi, 23)
  
  
• (Ey elçi!) İbrahimin hörmətli qonaqlarının xəbəri sənə gəlib çatdımı? (Zəriyət surəsi, 24)
  
  
• Onlar İbrahimin hüzuruna daxil olub salam verdiklərində o da: “Salam! Siz yad adamlarsınız”, - dedi. (Zəriyət surəsi, 25)
  
  
• İbrahim dərhal ailəsinin yanına getdi və kök bir buzov (qızardıb) gətirdi. (Zəriyət surəsi, 26)
  
  
• Yeməyi onlara yaxınlaşdırıb: “Yemirsinizmi?” - dedi. (Zəriyət surəsi, 27)
  
  
• İbrahim (qonaqların yemədiklərini görüb) dərhal onlardan qorxuya düşdü. Onlar: “Qorxma!” - dedilər və onu çox bilikli bir oğlan uşağı (İshaq) ilə müjdələdilər. (Zəriyət surəsi, 28)
  
  
• Onun zövcəsi (Sara) qışqıraraq gəldi və əlini üzünə vuraraq: “Mən sonsuz bir qoca qarıyam!” - dedi. (Zəriyət surəsi, 29)
  
  
• Onlar: “Rəbbin belə buyurdu. Şübhəsiz ki, O, hikmət sahibidir, hər şeyi biləndir!” - dedilər. (Zəriyət surəsi, 30)
  
  
• İbrahim dedi: “Elə isə sizin (mənimlə) nə işiniz var ey elçilər?” (Zəriyət surəsi, 31)
  
  
• Onlar dedilər: “Biz günahkar bir qövmə göndərilmişik ki, (Zəriyət surəsi, 32)
  
  
• Onların üstünə gildən daşlar yağdıraq. (Zəriyət surəsi, 33)
  
  
• Bu daşlar həddi aşanlar üçün Rəbbinin dərgahında işarələnmişdir. (Zəriyət surəsi, 34)
  
  
• Oradakı möminləri də (oradan) çıxartdıq. (Zəriyət surəsi, 35)
  
  
• Orada bir evdən (bir ailədən) başqa müsəlman tapmadıq. (Zəriyət surəsi, 36)
  
  
• Şiddətli əzabdan qorxanlar üçün orada (ibrətamiz) bir işarə saxladıq. (Zəriyət surəsi, 37)
  
  
• Musanın da (hekayəsində ibrətlər vardır)! Bir zaman onu açıq-aşkar bir dəlillə Fironun yanına göndərmişdik. (Zəriyət surəsi, 38)
  
  
• O (Firon), öz ordusu ilə birlikdə (haqdan) üz çevirib: “Bu sehrbazdır, yaxud dəlidir!” – demişdi. (Zəriyət surəsi, 39)
  
  
• Nəhayət, Fironu və əsgərlərini yaxaladıq və onları dənizə atdıq. O, (boğularkən, iman etmədiyi üçün) öz-özünü qınayırdı. (Zəriyət surəsi, 40)
  
  
• Ad qövmündə də (ibrətlər vardır)! O zaman onların üstünə faydasız (məhv edən) bir külək göndərmişdik. (Zəriyət surəsi, 41)
  
  
• O külək üstündən keçdiyi hər şeyi külə çevirirdi. (Zəriyət surəsi, 42)
  
  
• Səmud qövmündə də (ibrətlər vardır)! O zaman onlara: “Müəyyən bir vaxta qədər (dünya nemətlərindən) faydalanın!” - deyilmişdi. (Zəriyət surəsi, 43)
  
  
• Onlar Rəbbinin əmrinə qarşı çıxdılar və buna görə də onlar görə-görə (gündüz) özlərini ildırım vurmuşdu. (Zəriyət surəsi, 44)
  
  
• Beləliklə, onlar ayağa qalxa bilmədilər, onlara yardım edən də olmadı. (Zəriyət surəsi, 45)
  
  
• Daha əvvəl Nuh qövmünü də (məhv etmişdik). Çünki onlar fasiq bir qövm idilər. (Zəriyət surəsi, 46)
  
  
• Biz göyü əllərimizlə (qüdrətimizlə) yaratdıq və onu genişləndiririk. (Zəriyət surəsi, 47)
  
  
• Biz yeri də döşədik. Biz necə də gözəl döşəyirik! (Zəriyət surəsi, 48)
  
  
• Düşünüb ibrət alasınız deyə hər şeydən cüt-cüt yaratdıq. (Zəriyət surəsi, 49)
  
  
• (De:) “Allaha tərəf qaçın (yönəlin)! Həqiqətən, mən Onun tərəfindən sizə göndərilmiş açıq-aşkar xəbərdarlıq edən bir elçiyəm. (Zəriyət surəsi, 50)
  
  
• Allahla yanaşı başqa bir ilah qəbul etməyin! Həqiqətən, mən Onun tərəfindən sizə göndərilmiş açıq-aşkar xəbərdarlıq edən bir elçiyəm”. (Zəriyət surəsi, 51)
  
  
• Onlardan əvvəlkilərə də bir elçi gəldiyi zaman məhz belə demişdilər: “Bu sehrbazdır, yaxud divanədir!” (Zəriyət surəsi, 52)
  
  
• Bunu (nəsildən-nəsilə) bir-birinə vəsiyyətmi etmişdilər?! Xeyr! Onlar azğın bir qövmdür. (Zəriyət surəsi, 53)
  
  
• Artıq onlardan üz çevir! Sən bundan ötrü qınanmayacaqsan. (Zəriyət surəsi, 54)
  
  
• Sən öyüd-nəsihət ver! Çünki öyüd-nəsihət möminlərə fayda verər. (Zəriyət surəsi, 55)
  
  
• Cinləri və insanları yalnız Mənə ibadət etsinlər deyə yaratdım. (Zəriyət surəsi, 56)
  
  
• Mən onlardan nə bir ruzi, nə də Məni yedirtmələrini istəyirəm. (Zəriyət surəsi, 57)
  
  
• Şübhəsiz ki, ruzi verən, qüvvət sahibi və mətin olan Allahdır! (Zəriyət surəsi, 58)
  
  
• Həqiqətən, zülm edənləri də (keçmiş) yoldaşları kimi əzab qisməti gözləyir. Buna görə də onlar Məni tələsdirməsinlər. (Zəriyət surəsi, 59)
  
  
• Onlara vəd olunan günlərinə görə vay inkar edənlərin halına! (Zəriyət surəsi, 60)
  
  

Əsas Səhifə