Duxan surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Ha, Mim! (Duxan surəsi, 1)
  
  
• Açıq-aydın olan bu Kitaba and olsun ki, (Duxan surəsi, 2)
  
  
• Biz onu mübarək bir gecədə (Qədr gecəsində) nazil etdik. Şübhəsiz ki, Biz xəbərdarlıq edirik. (Duxan surəsi, 3)
  
  
• Hər hikmətli iş o gecə ayırd edilir - (Duxan surəsi, 4)
  
  
• Tərəfimizdən verilən bir əmr ilə. Həqiqətən, Biz elçilər göndəririk. (Duxan surəsi, 5)
  
  
• Rəbbindən bir rəhmət olaraq! Şübhəsiz, O, hər şeyi eşidəndir, biləndir. (Duxan surəsi, 6)
  
  
• Əgər yəqinliklə inanırsınızsa, bilin ki, O, göylərin, yerin və onların arasındakıların Rəbbidir. (Duxan surəsi, 7)
  
  
• Ondan başqa heç bir ilah yoxdur! Dirildən də, öldürən də Odur. O, həm sizin, həm də əcdadınızın Rəbbidir. (Duxan surəsi, 8)
  
  
• Xeyr! Onlar şübhə içində əylənirlər. (Duxan surəsi, 9)
  
  
• Ona görə də sən göydən açıq-aydın bir duman gələcəyi günü gözlə! (Duxan surəsi, 10)
  
  
• O duman insanları bürüyəcəkdir. Bu, acı bir əzabdır. (Duxan surəsi, 11)
  
  
• (O zaman insanlar belə deyəcəklər:) “Ey Rəbbimiz, bizi bu əzabdan xilas et! Həqiqətən, biz iman etmişik”. (Duxan surəsi, 12)
  
  
• İndi onların öyüd-nəsihəti qəbul etmələrinin nə xeyri var?! Halbuki onlara açıq-aşkar bir elçi gəlmişdi. (Duxan surəsi, 13)
  
  
• Sonra ondan üz döndərmiş və: “O, öyrədilmiş bir divanədir”, - demişdilər. (Duxan surəsi, 14)
  
  
• Biz sizi əzabdan bir az xilas edəcəyik, ancaq siz yenə (əvvəlki halınıza) geri dönəcəksiniz. (Duxan surəsi, 15)
  
  
• Onlara güclü bir zərbə endirəcəyimiz gün, şübhəsiz, Biz intiqamımızı alacağıq. (Duxan surəsi, 16)
  
  
• Biz onlardan əvvəl Firon qövmünü də sınağa çəkmişdik. Onlara şərəfli bir elçi gəlmişdi. (Duxan surəsi, 17)
  
  
• (O belə demişdi:) “Allahın bəndələrini mənə verin! Həqiqətən, mən sizə göndərilən etibarlı bir elçiyəm. (Duxan surəsi, 18)
  
  
• Allaha qarşı təkəbbürlənməyin! Şübhəsiz, mən sizə açıq-aydın bir dəlil gətirmişəm. (Duxan surəsi, 19)
  
  
• Sizin məni daşqalaq etməyinizdən mənim də, sizin də Rəbbiniz olan Allaha sığınmışam. (Duxan surəsi, 20)
  
  
• Əgər mənə inanmırsınızsa, məndən uzaq durun!” (Duxan surəsi, 21)
  
  
• Musa: “Həqiqətən, bunlar günahkar bir qövmdür!” - deyərək Rəbbinə səsləndi. (Duxan surəsi, 22)
  
  
• (Allah buyurdu:) “Bəndələrim (İsrail oğulları) ilə birlikdə gecə yola çıx! Siz (Firon ordusu tərəfindən) təqib olunacaqsınız. (Duxan surəsi, 23)
  
  
• Dənizi (yarıb keçdikdən sonra) açıq qoy! Şübhəsiz ki, onlar suda boğulacaq bir ordudur”. (Duxan surəsi, 24)
  
  
• Onlar qoyub getdilər neçə-neçə bağları, çeşmələri, (Duxan surəsi, 25)
  
  
• Əkinləri, gözəl məkanları, (Duxan surəsi, 26)
  
  
• Ləzzət aldıqları nemətləri. (Duxan surəsi, 27)
  
  
• Beləcə, Biz də o nemətləri başqa bir qövmə miras qoyduq. (Duxan surəsi, 28)
  
  
• Göy və yer onların arxasınca ağlamadı. Onlara möhlət də verilmədi. (Duxan surəsi, 29)
  
  
• Biz İsrail oğularını alçaldıcı əzabdan xilas etdik. (Duxan surəsi, 30)
  
  
• Firondan! Həqiqətən, o, təkəbbürlü və həddi aşanlardan idi. (Duxan surəsi, 31)
  
  
• Şübhəsiz ki, Biz onları (İsrail oğullarını) bilərək aləmlərdən (digər insanlardan) üstün etdik. (Duxan surəsi, 32)
  
  
• Onlara içində açıq-aydın imtahan olan möcüzələr verdik. (Duxan surəsi, 33)
  
  
• Şübhəsiz ki, bunlar (müşriklər) deyəcəklər: (Duxan surəsi, 34)
  
  
• “Biz dünyadakı ölümümüzdən sonra bir daha dirilməyəcəyik. (Duxan surəsi, 35)
  
  
• Əgər doğru deyirsinizsə, onda atalarımızı geri gətirin!” (Duxan surəsi, 36)
  
  
• Onlar daha yaxşıdır, yoxsa Tübbə qövmü və onlardan əvvəlkilər?! Biz onları məhv etdik. Həqiqətən, onlar günahkar idilər. (Duxan surəsi, 37)
  
  
• Biz göyləri, yeri və onların arasındakıları əyləncə olsun deyə yaratmadıq. (Duxan surəsi, 38)
  
  
• Biz onları haqqa aparan bir vasitə olaraq yaratdıq, lakin onların çoxu bunu bilmir. (Duxan surəsi, 39)
  
  
• Şübhəsiz ki, (haqqı batildən) ayırd etmə günü onların hamısı üçün təyin olunmuş bir vaxtdır. (Duxan surəsi, 40)
  
  
• O gün dostun dosta heç bir faydası olmayacaq və onlara heç bir köməklik də göstərilməyəcəkdir. (Duxan surəsi, 41)
  
  
• Ancaq Allahın mərhəmət etdiyi kəslər bundan istisnadır. Şübhəsiz ki, O, yenilməz qüvvət sahibidir, rəhmlidir. (Duxan surəsi, 42)
  
  
• Zəqqum ağacı! (Duxan surəsi, 43)
  
  
• O, günahkarların yeməyidir. (Duxan surəsi, 44)
  
  
• O, əridilmiş yağ kimi qarınlarda qaynayar. (Duxan surəsi, 45)
  
  
• Qaynayan su kimi! (Duxan surəsi, 46)
  
  
• (Allah cəhənnəm mələklərinə belə buyuracaq:) “Onu tutun və cəhənnəmin ortasına sürükləyin! (Duxan surəsi, 47)
  
  
• Sonra başından qaynar su tökərək ona əzab verin!” (Duxan surəsi, 48)
  
  
• (Və ona deyin:) “(Əzabı) dad! Sən (özünə görə) çox qüdrətli və şərəfli biri idin”. (Duxan surəsi, 49)
  
  
• Siz bundan şübhə edirdiniz. (Duxan surəsi, 50)
  
  
• Şübhəsiz ki, müttəqilər əmin-amanlıqda olacaqlar. (Duxan surəsi, 51)
  
  
• Bağçalarda və çeşmələr başında! (Duxan surəsi, 52)
  
  
• Onlar ipəkdən və atlazdan paltarlar geyinib qarşı-qarşıya əyləşəcəklər. (Duxan surəsi, 53)
  
  
• Həmçinin onları gözəl gözlü qadınlarla evləndirəcəyik. (Duxan surəsi, 54)
  
  
• Onlar orada əmin-amanlıq içində hər cür meyvədən gətizdirəcəklər. (Duxan surəsi, 55)
  
  
• Onlar dünyadakı ölümdən sonra orada heç bir ölümü dadmayacaqlar. Allah onları cəhənnəm əzabından qorumuşdur. (Duxan surəsi, 56)
  
  
• Bu, Rəbbindən gələn bir lütfdür. Əsil böyük uğur budur! (Duxan surəsi, 57)
  
  
• Bəlkə öyüd alalar deyə, onu (Quranı) sənin dilinlə asanlaşdırdıq. (Duxan surəsi, 58)
  
  
• Buna görə də sən (onların məhvini) gözlə! Onlar da gözləyirlər. (Duxan surəsi, 59)
  
  

Əsas Səhifə