Şuəra surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Ta, Sin, Mim! (Şuəra surəsi, 1)
  
  
• Bunlar açıq-aydın Kitabın ayələridir. (Şuəra surəsi, 2)
  
  
• (Ey elçi!) Onlar iman etmirlər deyə az qalsın özünü məhv edəcəksən. (Şuəra surəsi, 3)
  
  
• Əgər diləsəydik, onlara göydən bir möcüzə endirərdik, onlar da ona boyun əyərdilər. (Şuəra surəsi, 4)
  
  
• Onlar Rəhman olan Allahdan özlərinə gələn hər bir yeni öyüddən üz döndərirlər. (Şuəra surəsi, 5)
  
  
• Onlar (Quranı) təkzib etdilər. Ancaq istehza etdiklərinin xəbərləri onlara gələcəkdir. (Şuəra surəsi, 6)
  
  
• Bəs onlar yer üzündə neçə-neçə gözəl bitkilər yetişdirdiyimizə baxmırlarmı?! (Şuəra surəsi, 7)
  
  
• Şübhəsiz ki, bunda bir ibrət vardır. Ancaq onların çoxu iman etməz. (Şuəra surəsi, 8)
  
  
• Həqiqətən, Rəbbin yenilməz qüvvət və mərhəmət sahibidir. (Şuəra surəsi, 9)
  
  
• Bir zaman Rəbbin Musaya səslənmişdi: “Zalım qövmün yanına get - (Şuəra surəsi, 10)
  
  
• Firon qövmünün yanına! Onlar (başlarına gələcək fəlakətdən) qorxmurlarmı?” (Şuəra surəsi, 11)
  
  
• Musa dedi: “Ey Rəbbim! Məni təkzib etmələrindən qorxuram. (Şuəra surəsi, 12)
  
  
• Ürəyim sıxılır, dilim də söz tutmur (kəkələyirəm). Buna görə Harunu da (mənimlə) elçi olaraq göndər! (Şuəra surəsi, 13)
  
  
• Onların mənə isnad etdikləri bir günah da var. Buna görə də məni öldürmələrindən qorxuram”. (Şuəra surəsi, 14)
  
  
• Allah buyurdu: “Xeyr (səni öldürə bilməzlər)! Möcüzələrimizlə gedin! Şübhəsiz ki, Biz sizinləyik, hər şeyi eşidirik. (Şuəra surəsi, 15)
  
  
• Fironun yanına gedib deyin: “Biz aləmlərin Rəbbinin elçiləriyik! (Şuəra surəsi, 16)
  
  
• İsrail oğullarını bizimlə göndər!” (Şuəra surəsi, 17)
  
  
• (Firon) dedi: “Biz səni körpə ikən himayəmizə götürüb böyütmədikmi? Sən illərlə aramızda yaşadın. (Şuəra surəsi, 18)
  
  
• Edəcəyini də etdin. Sən nankorlardansan!” (Şuəra surəsi, 19)
  
  
• Musa dedi: “Mən o işi edərkən nadanlardan idim. (Şuəra surəsi, 20)
  
  
• Sizdən qorxduğum üçün dərhal aranızdan qaçdım. Sonra Rəbbim mənə hikmət verdi və məni elçilərdən etdi. (Şuəra surəsi, 21)
  
  
• Mənə minnət qoyduğun o nemət də İsrail oğullarını özünə qul etməyindir”. (Şuəra surəsi, 22)
  
  
• Firon: “Bəs aləmlərin Rəbbi nədir?” - dedi. (Şuəra surəsi, 23)
  
  
• Musa dedi: “Əgər düşünüb anlayırsınızsa, (bilin ki,) göylərin, yerin və o ikisinin arasında olanların Rəbbidir!” (Şuəra surəsi, 24)
  
  
• (Firon) öz ətrafındakılara: “Eşitmirsinizmi?” - dedi. (Şuəra surəsi, 25)
  
  
• Musa dedi: “O, sizin də, əvvəlki atalarınızın da Rəbbidir!” (Şuəra surəsi, 26)
  
  
• (Firon) dedi: “Sizə göndərilən elçi, həqiqətən, dəlidir!” (Şuəra surəsi, 27)
  
  
• Musa: “Əgər ağlınızı işlətsəniz, (bilərsiniz ki,) O, şərqin, qərbin və ikisi arasında olan hər şeyin Rəbbidir!” - dedi. (Şuəra surəsi, 28)
  
  
• (Firon) dedi: “Əgər məndən başqasını ilah qəbul etsən, səni mütləq həbs edəcəyəm!” (Şuəra surəsi, 29)
  
  
• Musa: “Sənə açıq-aşkar bir şey (möcüzə) gətirsəm, necə?” - dedi. (Şuəra surəsi, 30)
  
  
• (Firon) dedi: “Əgər doğru söyləyirsənsə, gətir onu!” (Şuəra surəsi, 31)
  
  
• Bu zaman Musa əsasını atdı və o, dərhal böyük bir ilana döndü. (Şuəra surəsi, 32)
  
  
• Əlini (qoynundan) çıxartdı və bu vaxt o, baxanlara ağappaq göründü. (Şuəra surəsi, 33)
  
  
• (Firon) ətrafındakı əyanlara dedi: “Həqiqətən, bu, çox bilikli bir sehrbazdır. (Şuəra surəsi, 34)
  
  
• O, sehri ilə sizi yurdunuzdan çıxartmaq istəyir. İndi siz nə buyurursunuz?” (Şuəra surəsi, 35)
  
  
• Onlar dedilər: “Onu və qardaşını yubandır və şəhərlərə (sehrbazları) yığan adamlar göndər ki, (Şuəra surəsi, 36)
  
  
• Bütün bilikli sehrbazları sənin yanına gətirsinlər”. (Şuəra surəsi, 37)
  
  
• Beləcə, məlum bir günün müəyyən vaxtında sehrbazlar yığıldılar. (Şuəra surəsi, 38)
  
  
• İnsanlara da belə deyildi: “Siz də yığılırsınızmı? (Şuəra surəsi, 39)
  
  
• Əgər sehrbazlar qalib gəlsələr, çox güman ki, biz də onların arxasınca gedərik”. (Şuəra surəsi, 40)
  
  
• Sehrbazlar gəldikləri zaman Firona: “Əgər biz qalib gəlsək, bizə bir mükafat veriləcəkmi?” - dedilər. (Şuəra surəsi, 41)
  
  
• (Firon) dedi: “Bəli! O zaman siz, əlbəttə, yaxın adamlarımdan olacaqsınız”. (Şuəra surəsi, 42)
  
  
• Musa onlara: “Nə atacaqsınızsa, atın!” - dedi. (Şuəra surəsi, 43)
  
  
• Bu zaman onlar iplərini və əsalarını atıb: “Fironun qüdrətinə and olsun ki, biz qalib gələcəyik!” - dedilər. (Şuəra surəsi, 44)
  
  
• Musa da əsasını atdı və o, (böyük bir ilana çevrilib) dərhal onların uydurduqları şeyləri uddu. (Şuəra surəsi, 45)
  
  
• Bu zaman sehrbazlar səcdəyə qapandılar. (Şuəra surəsi, 46)
  
  
• Onlar belə dedilər: “Biz iman etdik aləmlərin Rəbbinə - (Şuəra surəsi, 47)
  
  
• Musanın və Harunun Rəbbinə!” (Şuəra surəsi, 48)
  
  
• (Firon qəzəblənərək:) “Mən sizə icazə vermədən ona iman etdiniz. Deməli, o, sizə sehr öyrədən böyüyünüzdür. Əlbəttə, (sizə nə edəcəyimi) biləcəksiniz. Mütləq sizin əllərinizi və ayaqlarınızı çarpaz kəsdirib hamınızı çarmıxa çəkdirəcəyəm!” - dedi. (Şuəra surəsi, 49)
  
  
• (Sehrbazlar) dedilər: “Zərəri yoxdur. Biz Rəbbimizə dönəcəyik. (Şuəra surəsi, 50)
  
  
• Biz ümid edirik ki, ilk iman edənlər olduğumuza görə Rəbbimiz xətalarımızı bağışlayacaq”. (Şuəra surəsi, 51)
  
  
• Biz Musaya: “Bəndələrimlə gecə yola çıx! Şübhəsiz ki, siz (Firon və ordusu tərəfindən) təqib ediləcəksiniz”, - deyə vəhy etdik. (Şuəra surəsi, 52)
  
  
• Firon şəhərlərə (əsgər) yığanlar göndərdi. (Şuəra surəsi, 53)
  
  
• (Və belə dedi:) “Həqiqətən, bunlar az saylı bir tayfadır. (Şuəra surəsi, 54)
  
  
• Onlar bizi qəzəbləndirdilər. (Şuəra surəsi, 55)
  
  
• Biz isə, əlbəttə, gözüaçıq bir camaatıq!” (Şuəra surəsi, 56)
  
  
• Beləcə, onları (Firon və ordusunu) bağlardan və bulaqlardan çıxartdıq. (Şuəra surəsi, 57)
  
  
• Xəzinələrdən və dəyərli yerdən (çıxartdıq). (Şuəra surəsi, 58)
  
  
• Beləcə, İsrail oğullarını oraların varisi etdik. (Şuəra surəsi, 59)
  
  
• (Firon və ordusu) günəş doğarkən onların arxasınca düşdü. (Şuəra surəsi, 60)
  
  
• İki dəstə bir-birini gördüyü zaman Musanın yanındakılar: “Həqiqətən, onlar bizə çatacaqlar!” – dedilər. (Şuəra surəsi, 61)
  
  
• Musa: “Əsla! Şübhəsiz ki, Rəbbim mənimlədir. O mənə yol göstərəcəkdir!” - dedi. (Şuəra surəsi, 62)
  
  
• Bu zaman Musaya belə vəhy etdik: “Əsanla dənizə vur!”(Musa əsasını dənizə vurduqda) dərhal yarıldı və (suyun) hər bir hissəsi böyük bir dağ kimi oldu. (Şuəra surəsi, 63)
  
  
• Digərlərini də ora yaxınlaşdırdıq. (Şuəra surəsi, 64)
  
  
• Musa və yanındakıların hamısını xilas etdik. (Şuəra surəsi, 65)
  
  
• Sonra da digərlərini (Firon və ordusunu) suda boğduq. (Şuəra surəsi, 66)
  
  
• Şübhəsiz ki, bunda bir ibrət vardır. Ancaq onların çoxu iman etmədi. (Şuəra surəsi, 67)
  
  
• Şübhəsiz ki, sənin Rəbbin yenilməz qüvvət sahibidir, rəhmlidir. (Şuəra surəsi, 68)
  
  
• (Ey elçi!) Onlara İbrahimin hekayəsini də danış! (Şuəra surəsi, 69)
  
  
• Bir zamanlar o, atasına və qövmünə: “Siz nəyə ibadət edirsiniz?” - demişdi. (Şuəra surəsi, 70)
  
  
• Onlar da: “Biz bütlərə ibadət edir və (gün boyu) onlara sitayiş etməyə davam edirik!” - demişdilər. (Şuəra surəsi, 71)
  
  
• O demişdi: “Dua etdiyiniz zaman onlar sizi eşidirlərmi? (Şuəra surəsi, 72)
  
  
• Yaxud sizə xeyir və ya zərər verə bilirlərmi?” (Şuəra surəsi, 73)
  
  
• Onlar: “Xeyr, ancaq atalarımızın belə etdiyini görmüşük!” - demişdilər. (Şuəra surəsi, 74)
  
  
• İbrahim demişdi: “Elə isə, heç düşündünüzmü nəyə ibadət edirsiniz - (Şuəra surəsi, 75)
  
  
• Siz və əcdadınız? (Şuəra surəsi, 76)
  
  
• Şübhəsiz ki, aləmlərin Rəbbindən başqaları (bütlər) mənim düşmənimdir. (Şuəra surəsi, 77)
  
  
• O məni yaratdı və doğru yola yönəltdi. (Şuəra surəsi, 78)
  
  
• O məni yedirir və içirir. (Şuəra surəsi, 79)
  
  
• Xəstələndiyim zaman O mənə şəfa verir. (Şuəra surəsi, 80)
  
  
• O məni öldürəcək, sonra da dirildəcəkdir. (Şuəra surəsi, 81)
  
  
• Onun axirət günü xətalarımı bağışlayacağını ümid edirəm. (Şuəra surəsi, 82)
  
  
• Ey Rəbbim, mənə hökm (elm) ver və məni salehlərin arasına daxil et! (Şuəra surəsi, 83)
  
  
• Mənə, gələcək nəsillər tərəfindən xeyirlə yad edilməyi qismət et! (Şuəra surəsi, 84)
  
  
• Məni Nəim cənnətinin varislərindən et! (Şuəra surəsi, 85)
  
  
• Atamı da bağışla! Həqiqətən, o, haqq yoldan azanlardandır. (Şuəra surəsi, 86)
  
  
• İnsanların dirildiləcəkləri gün məni rüsvay etmə!” (Şuəra surəsi, 87)
  
  
• O gün nə mal-mülk, nə də övladlar fayda verər. (Şuəra surəsi, 88)
  
  
• Ancaq təmiz bir qəlblə Allahın hüzuruna gələn kimsə bundan istisnadır! (Şuəra surəsi, 89)
  
  
• (O gün) cənnət müttəqilərə yaxınlaşdırılar. (Şuəra surəsi, 90)
  
  
• Cəhənnəm də azğınlara (inkar edənlərə) açıq bir şəkildə göstərilər. (Şuəra surəsi, 91)
  
  
• Və onlara belə deyərlər: “İbadət etdikləriniz haradadır? (Şuəra surəsi, 92)
  
  
• Allahdan başqa (ibadət etdikləriniz)! Onlar sizə, yaxud özlərinə kömək edə bilərlərmi?” (Şuəra surəsi, 93)
  
  
• Onlar və azğınlar ora (cəhənnəmə) atılarlar. (Şuəra surəsi, 94)
  
  
• İblisin bütün əsgərləri də (ora atılarlar). (Şuəra surəsi, 95)
  
  
• Onlar orada (bütləri ilə) mübahisə edərək belə deyərlər: (Şuəra surəsi, 96)
  
  
• “Allaha and olsun ki, biz açıq-aydın bir zəlalət içindəydik! (Şuəra surəsi, 97)
  
  
• Çünki biz sizi aləmlərin Rəbbi ilə bir tuturduq. (Şuəra surəsi, 98)
  
  
• Bizi günahkarlar azdırdı. (Şuəra surəsi, 99)
  
  
• Artıq bizim heç bir şəfaətçimiz yoxdur. (Şuəra surəsi, 100)
  
  
• Heç bir yaxın dostumuz da yoxdur. (Şuəra surəsi, 101)
  
  
• Təkrar dünyaya qayıda bilsəydik, biz də möminlərdən olardıq”. (Şuəra surəsi, 102)
  
  
• Şübhəsiz ki, bunda bir ibrət vardır. Ancaq onların əksəriyyəti iman etməz. (Şuəra surəsi, 103)
  
  
• Həqiqətən, sənin Rəbbin qüdrətlidir, mərhəmətlidir. (Şuəra surəsi, 104)
  
  
• Nuh qövmü də elçiləri təkzib etdi. (Şuəra surəsi, 105)
  
  
• O zaman qardaşları Nuh onlara belə demişdi: “(Allahdan) qorxmursunuzmu? (Şuəra surəsi, 106)
  
  
• Həqiqətən, mən sizə göndərilən etibarlı bir elçiyəm. (Şuəra surəsi, 107)
  
  
• Allahdan qorxun və mənə itaət edin! (Şuəra surəsi, 108)
  
  
• Bunun əvəzində mən sizdən heç nə istəmirəm. Mənim mükafatımı yalnız aləmlərin Rəbbi verəcəkdir. (Şuəra surəsi, 109)
  
  
• Ona görə də Allahdan qorxun və mənə itaət edin!” (Şuəra surəsi, 110)
  
  
• Onlar: “Ən səfil insanlar sənə tabe olmuşkən, heç sənə iman edərikmi?” - dedilər. (Şuəra surəsi, 111)
  
  
• Nuh dedi: “Onların etdiyi əməllərdən mənim xəbərim yoxdur. (Şuəra surəsi, 112)
  
  
• Onları hesaba çəkmək yalnız Rəbbimə məxsusdur. Kaş biləydiniz. (Şuəra surəsi, 113)
  
  
• Mən iman edənləri qovan deyiləm. (Şuəra surəsi, 114)
  
  
• Mən ancaq açıq-aşkar xəbərdar edənəm!” (Şuəra surəsi, 115)
  
  
• Onlar: “Ey Nuh! Əgər bundan vaz keçməsən, daşqalaq ediləcəksən!” - dedilər. (Şuəra surəsi, 116)
  
  
• Nuh dedi: “Ey Rəbbim! Qövmüm məni yalanladı. (Şuəra surəsi, 117)
  
  
• Artıq mənimlə onların arasında Sən hökm ver! Məni və mənimlə olan möminləri xilas et!” (Şuəra surəsi, 118)
  
  
• Beləliklə, onu və yüklü gəmidə onunla olanları xilas etdik. (Şuəra surəsi, 119)
  
  
• Sonra da yerdə qalanları suda boğduq. (Şuəra surəsi, 120)
  
  
• Şübhəsiz ki, bunda bir ibrət vardır. Ancaq onların əksəriyyəti iman etməz. (Şuəra surəsi, 121)
  
  
• Həqiqətən, sənin Rəbbin yenilməz qüvvət sahibidir, mərhəmətlidir. (Şuəra surəsi, 122)
  
  
• Ad qövmü də elçiləri təkzib etdi. (Şuəra surəsi, 123)
  
  
• O zaman qardaşları Hud onlara belə demişdi: “Siz (Allahdan) qorxmursunuzmu? (Şuəra surəsi, 124)
  
  
• Həqiqətən, mən sizə göndərilən etibarlı bir elçiyəm. (Şuəra surəsi, 125)
  
  
• Ona görə də Allahdan qorxun və mənə itaət edin! (Şuəra surəsi, 126)
  
  
• Bunun əvəzində mən sizdən heç nə istəmirəm. Mənim mükafatımı yalnız aləmlərin Rəbbi verəcəkdir. (Şuəra surəsi, 127)
  
  
• Siz hər yüksək yerə bir əlamət quraraq (hündür binalar tikərək) əylənirsinizmi? (Şuəra surəsi, 128)
  
  
• Əbədi qalacağınızı umaraq möhkəm qalalar tikirsiniz. (Şuəra surəsi, 129)
  
  
• Birini yaxaladığınız zaman qəddarcasına yaxalayırsınız. (Şuəra surəsi, 130)
  
  
• Allahdan qorxun və mənə itaət edin! (Şuəra surəsi, 131)
  
  
• Gözünüzün qabağındakı nemətləri sizə bol-bol verəndən qorxun! (Şuəra surəsi, 132)
  
  
• O sizə mal-qara və övladlar verdi. (Şuəra surəsi, 133)
  
  
• Bağlar və bulaqlar (verdi). (Şuəra surəsi, 134)
  
  
• Həqiqətən, mən sizin üçün böyük günün əzabından qorxuram!” (Şuəra surəsi, 135)
  
  
• Onlar dedilər: “Öyüd versən də, verməsən də, bizim üçün fərqi yoxdur. (Şuəra surəsi, 136)
  
  
• Bu, əvvəlkilərin adətlərindən başqa bir şey deyildir. (Şuəra surəsi, 137)
  
  
• Biz əzaba məruz qalası da deyilik”. (Şuəra surəsi, 138)
  
  
• Beləcə, onu təkzib etdilər. Biz də onları məhv etdik. Həqiqətən, bunda bir ibrət vardır. Ancaq onların çoxu iman etməz. (Şuəra surəsi, 139)
  
  
• Şübhəsiz ki, sənin Rəbbin qüdrətlidir, mərhəmətlidir. (Şuəra surəsi, 140)
  
  
• Səmud qövmü də elçiləri təkzib etdi. (Şuəra surəsi, 141)
  
  
• O zaman qardaşları Saleh onlara belə demişdi: “(Allahdan) qorxmursunuzmu? (Şuəra surəsi, 142)
  
  
• Həqiqətən, mən sizə göndərilən etibarlı bir elçiyəm. (Şuəra surəsi, 143)
  
  
• Ona görə də Allahdan qorxun və mənə itaət edin! (Şuəra surəsi, 144)
  
  
• Mən bunun əvəzində sizdən heç nə istəmirəm. Mənim mükafatımı yalnız aləmlərin Rəbbi verəcəkdir. (Şuəra surəsi, 145)
  
  
• Burada əmin-amanlıqda qalacaqsınız? (Şuəra surəsi, 146)
  
  
• Bağlar və bulaqlar, (Şuəra surəsi, 147)
  
  
• Əkinlər və dəymiş meyvəli xurmalıqlarda? (Şuəra surəsi, 148)
  
  
• Siz dağlardan ustalıqla evlər yonub düzəldirsiniz. (Şuəra surəsi, 149)
  
  
• Allahdan qorxun və mənə itaət edin! (Şuəra surəsi, 150)
  
  
• Həddi aşanların əmrinə itaət etməyin!” (Şuəra surəsi, 151)
  
  
• Onlar yer üzündə fəsad çıxarar, əmin-amanlıq yaratmazlar. (Şuəra surəsi, 152)
  
  
• Onlar dedilər: “Həqiqətən, sən ovsunlanmısan! (Şuəra surəsi, 153)
  
  
• Sən də bizim kimi bir insansan. Əgər doğru söyləyənlərdənsənsə, onda bir möcüzə gətir!” (Şuəra surəsi, 154)
  
  
• Saleh dedi: “Möcüzə bu dişi dəvədir. Müəyyən günlərdə onun və sizin su içmə haqqınız vardır. (Şuəra surəsi, 155)
  
  
• Ona heç bir zərər verməyin! Yoxsa böyük günün əzabı sizi yaxalayar”. (Şuəra surəsi, 156)
  
  
• Ancaq onlar onu tutub kəsdilər, sonra da peşman oldular. (Şuəra surəsi, 157)
  
  
• Buna görə də əzab onları yaxaladı. Şübhəsiz ki, bunda bir ibrət vardır. Ancaq onların çoxu iman etməz. (Şuəra surəsi, 158)
  
  
• Həqiqətən, sənin Rəbbin qüdrətlidir, mərhəmətlidir. (Şuəra surəsi, 159)
  
  
• Lut qövmü də elçiləri təkzib etdi. (Şuəra surəsi, 160)
  
  
• O zaman qardaşları Lut onlara belə demişdi: “(Allahdan) qorxmursunuzmu? (Şuəra surəsi, 161)
  
  
• Həqiqətən, mən sizə göndərilən etibarlı bir elçiyəm. (Şuəra surəsi, 162)
  
  
• Ona görə də Allahdan qorxun və mənə itaət edin! (Şuəra surəsi, 163)
  
  
• Mən bunun əvəzində sizdən heç nə istəmirəm. Mənim mükafatımı yalnız aləmlərin Rəbbi verəcəkdir. (Şuəra surəsi, 164)
  
  
• Siz insanlardan kişilərləmi yaxınlıq edirsiniz? (Şuəra surəsi, 165)
  
  
• Rəbbinizin sizin üçün yaratdığı qadınlarınızı qoyub (kişilərlə yaxınlıq edirsiniz)? Xeyr, siz həddi aşan bir qövmsünüz” . (Şuəra surəsi, 166)
  
  
• Onlar: “Ey Lut! Əgər (bu işdən) vaz keçməsən, sən mütləq qovulanlardan olacaqsan!” - dedilər. (Şuəra surəsi, 167)
  
  
• Lut dedi: “Həqiqətən, mən sizin bu əməlinizdən nifrət edənlərdənəm. (Şuəra surəsi, 168)
  
  
• Ey Rəbbim! Məni və ailəmi onların etdiklərindən xilas et!” (Şuəra surəsi, 169)
  
  
• Beləcə, onu və bütün ailəsini xilas etdik, (Şuəra surəsi, 170)
  
  
• Geridə qalan yaşlı qadından (Lutun günahkar zövcəsindən) başqa! (Şuəra surəsi, 171)
  
  
• Sonra digərlərini məhv etdik. (Şuəra surəsi, 172)
  
  
• Onların üzərinə bir yağış yağdırdıq. Xəbərdar edilənlər nə pis yağışa tutuldular! (Şuəra surəsi, 173)
  
  
• Şübhəsiz, bunda bir ibrət vardır. Ancaq onların çoxu iman etməz. (Şuəra surəsi, 174)
  
  
• Həqiqətən, sənin Rəbbin yenilməz qüvvət sahibidir, mərhəmətlidir. (Şuəra surəsi, 175)
  
  
• Əykə xalqı da elçiləri təkzib etdi. (Şuəra surəsi, 176)
  
  
• Bir zaman Şüeyb onlara belə demişdi: “(Allahdan) qorxmursunuzmu? (Şuəra surəsi, 177)
  
  
• Həqiqətən, mən sizə göndərilən etibarlı bir elçiyəm. (Şuəra surəsi, 178)
  
  
• Ona görə də Allahdan qorxun və mənə itaət edin! (Şuəra surəsi, 179)
  
  
• Mən bunun əvəzində sizdən heç nə istəmirəm. Mənim mükafatımı yalnız aləmlərin Rəbbi verəcəkdir. (Şuəra surəsi, 180)
  
  
• (Tərəzidə) ölçüyə tam riayət edin və (insanların haqqını) əskik verənlərdən olmayın! (Şuəra surəsi, 181)
  
  
• Düzgün tərəzi ilə çəkin! (Şuəra surəsi, 182)
  
  
• İnsanların haqqını əskiltməyin və yer üzündə fitnə-fəsad törədərək qarışıqlıq salmayın! (Şuəra surəsi, 183)
  
  
• Sizi və əvvəlki nəsilləri yaradandan qorxun!” (Şuəra surəsi, 184)
  
  
• Onlar dedilər: “Sən, həqiqətən, ovsunlanmısan. (Şuəra surəsi, 185)
  
  
• Sən də bizim kimi bir insansan. Biz səni yalançılardan biri hesab edirik. (Şuəra surəsi, 186)
  
  
• Əgər doğru söyləyənlərdənsənsə, o zaman üzərimizə göydən əzab yağdır!” (Şuəra surəsi, 187)
  
  
• Şüeyb: “Rəbbim sizin etdiklərinizi çox yaxşı bilir”, - dedi. (Şuəra surəsi, 188)
  
  
• Beləcə, onu təkzib etdilər. Buna görə də kölgəli günün əzabı onları yaxaladı. Həqiqətən, o, böyük bir günün əzabı idi. (Şuəra surəsi, 189)
  
  
• Şübhəsiz ki, bunda bir ibrət vardır. Ancaq onların əksəriyyəti iman etməz. (Şuəra surəsi, 190)
  
  
• Həqiqətən, sənin Rəbbin yenilməz qüvvət sahibidir, mərhəmətlidir. (Şuəra surəsi, 191)
  
  
• Heç şübhəsiz, bunu (Quranı) aləmlərin Rəbbi nazil etmişdir. (Şuəra surəsi, 192)
  
  
• Onu Ruhul-əmin endirdi. (Şuəra surəsi, 193)
  
  
• Sənin qəlbinə endirdi ki, xəbərdar edənlərdən olasan. (Şuəra surəsi, 194)
  
  
• Açıq-aydın ərəb dilində! (Şuəra surəsi, 195)
  
  
• Şübhəsiz ki, o, əvvəlkilərin kitablarında da vardır. (Şuəra surəsi, 196)
  
  
• İsrail oğulları alimlərinin onu bilmələri onlar üçün bir dəlil deyilmi? (Şuəra surəsi, 197)
  
  
• Əgər onu (Quranı) ərəb olmayanlardan birinə nazil etsəydik, (Şuəra surəsi, 198)
  
  
• Və bunu (Quranı) onlara oxusaydı, yenə də ona iman etməzdilər. (Şuəra surəsi, 199)
  
  
• Beləcə Biz onu (küfrü) günahkarların qəlbinə saldıq. (Şuəra surəsi, 200)
  
  
• Onlar şiddətli əzabı görənə qədər ona iman etməzlər. (Şuəra surəsi, 201)
  
  
• (Əzab) onlara özləri də hiss etmədən qəfildən gələr. (Şuəra surəsi, 202)
  
  
• Bu zaman onlar: “Görəsən, (iman etməyimiz üçün) bizə möhlət verilərmi?” - deyərlər. (Şuəra surəsi, 203)
  
  
• Onlar əzabımızın tez gəlməsinimi istəyirlər? (Şuəra surəsi, 204)
  
  
• Gördünmü, əgər onlara illərlə nemətlər versək, (Şuəra surəsi, 205)
  
  
• Sonra da vəd olunan (əzab) onlara gəlsə, (Şuəra surəsi, 206)
  
  
• Özlərinə verilən nemətlər onlara heç bir fayda verməz. (Şuəra surəsi, 207)
  
  
• Biz xəbərdar edən bir elçi göndərmədən heç bir məmləkəti məhv etmədik. (Şuəra surəsi, 208)
  
  
• (Bu onlar üçün) öyüddür. Biz zalım deyilik. (Şuəra surəsi, 209)
  
  
• Onu (Quranı) şeytanlar endirmədi. (Şuəra surəsi, 210)
  
  
• Onlar buna layiq deyillər və gücləri də çatmaz. (Şuəra surəsi, 211)
  
  
• Şübhəsiz ki, onlar (vəhyə) qulaq asmaqdan uzaqlaşdırılmışlar. (Şuəra surəsi, 212)
  
  
• Ona görə də Allahla yanaşı başqa bir ilaha dua etmə, yoxsa əzaba düçar edilənlərdən olarsan! (Şuəra surəsi, 213)
  
  
• Ən yaxın qohumlarını xəbərdar et! (Şuəra surəsi, 214)
  
  
• Sənə uyan möminləri qanadının altına al! (Şuəra surəsi, 215)
  
  
• Əgər sənə qarşı çıxsalar, de ki: “Həqiqətən, mən sizin etdiklərinizdən uzağam!” (Şuəra surəsi, 216)
  
  
• Yenilməz qüvvət sahibi və mərhəmətli olan Allaha təvəkkül et! (Şuəra surəsi, 217)
  
  
• O Allah ki, namaza durduğun zaman səni görür. (Şuəra surəsi, 218)
  
  
• Səcdə edənlərin arasında əyilib-qalxdığını da (görür). (Şuəra surəsi, 219)
  
  
• Həqiqətən, O hər şeyi eşidəndir, biləndir. (Şuəra surəsi, 220)
  
  
• Şeytanların kimə nazil olduğunu sizə xəbər verimmi? (Şuəra surəsi, 221)
  
  
• Onlar günahkar və yalançı olan hər kəsə nazil olarlar. (Şuəra surəsi, 222)
  
  
• Onlar eşitdiklərini (kahinlərə) çatdırarlar. Ancaq onların çoxu yalançıdır. (Şuəra surəsi, 223)
  
  
• Şairlərə gəldikdə, onlara azğınlar tabe olar. (Şuəra surəsi, 224)
  
  
• Onların hər bir vadidə sərgərdan dolaşdıqlarını görmədinmi?! (Şuəra surəsi, 225)
  
  
• Onlar etmədiklərini söyləyirlər. (Şuəra surəsi, 226)
  
  
• Ancaq iman edib yaxşı işlər görənlər, Allahı çox zikr edənlər və haqsızlığa məruz qaldıqdan sonra qalib gələnlər bundan istisnadır. Haqsızlıq edənlər qayıdacaqları yeri yaxın bir vaxtda biləcəklər. (Şuəra surəsi, 227)
  
  

Əsas Səhifə